آرمان تبریز-چرخی دؤنسون فلکین/ کریم قربانزاده؛ بو نئچه ایلده هردفعه قلم اله آلمیشام کی، آذربایجان ساتیراسی‌نین صابیر روحلو اوغلو، معجز شبستری‌نین حقیقی واریثی، موعاصیر آذربایجانیمیزین ساتیراسی‌نین اونودولماز شخصیتی «حمید آرش آزاد»دان یازام، اونون اؤلومونه اینانمادیغیم اوچون، بارماقلاریم سوستالیب، قلم عاجیزلشیب و واز کئچمیشم.

آرمان تبریز-چرخی دؤنسون فلکین/ کریم قربانزاده؛ بو نئچه ایلده هردفعه قلم اله آلمیشام کی، آذربایجان ساتیراسی‌نین صابیر روحلو اوغلو، معجز شبستری‌نین حقیقی واریثی، موعاصیر آذربایجانیمیزین ساتیراسی‌نین اونودولماز شخصیتی «حمید آرش آزاد»دان یازام، اونون اؤلومونه اینانمادیغیم اوچون، بارماقلاریم سوستالیب، قلم عاجیزلشیب و واز کئچمیشم.
آخی او بیزیمله یاشاییر. بیز اونونلا هر گون گؤروشوروک؛ هر موناسیبته شعرینی لاپ تاپ- تزه اوخویوروق؛ اونونلا دانیشیریق؛ او بیزی گولدوره- گولدوره اورکدن آغلادیر؛ بونا گؤره‌دیر کی اونون اولماماسیندا یازماق آداما گولونج بیر ایش کیمی گلیر. نئجه اولا بیلر کی آرش سنی یاشادارکن، سن اونون اؤلوموندن دانیشاسان! من آرش‌له لاپ ائله قاباقداکیلار کیمی هرگون گؤروشورم. اونون فروغ آزادی‌ده، عصر آزادی‌ده، امین‌ روزنامه‌سین‌ده، پیام روز سراب‌دا گؤروشونه گئدیرم. اورالاردا تاپا بیلمه‌سم آذربایجانین موختلیف ادبی، مدنی در‌نک‌لرینه باش چکیرم؛ هئچ اولماسا اونونلا نیظامی انجومنینده مطلق گؤروشورم. گؤرورم اوردا اوستاد شیدا‌ایله چیین به چیین اوتوروب، هردن یاواشجادان بیر- بیرلریله پیچیلداشیب گولورلر. همیشه‌ده‌کی کیمی سیگارینین اودو کؤزه‌ریر؛ اوزوندن گیزلی بیر گولوش اسکیک دئییل؛ دوداغیندان گولوش یاغیر؛ هئچ نه، هئچ کیم، هئچ مقام اونون درین باخیشلاریندان ایتیب، اؤزونو گیزله‌ده بیلمیر؛ سؤز شالاغی یئنه‌ده بوتون عیبه‌جرلیک‌لری، چیرکین‌لیک‌لری افشا ائتمک اوچون هاوادا اویناییر. یولوم تهرانا دوشنده اونونلا گؤروشوب، دردلشمک اوچون صابیر انجومنی‌نه باش وورورام؛ گئجه‌سی بیرلیکده ساهر ادبی- مدنی درنه‌یی‌نین قوناغی اولوروق؛ صاباحیسی گون شیدا انجومنینه، قاراداغ انجومنینه گئدیریک و یادیمیزدان چیخماسین دئیه، تبریزه قاییتمادان اؤنجه، ایشیق گنجلری‌نه‌ده باش وورمالی‌ییق؛ آخی آرش آذربایجانیمیزین بو گنجلرینه و ایشیق سایتینا بیر چوخ شعر تحفه‌سی وئره‌جکدیر. کئچن هفته‌ده‌ تهرانا گلمیشدی. بیرلیکده میرزا شهرکین یوبلئیی مراسیمینده اشتراک ائتدیک.

ساتیرامیزین گورکملی سیمالاری وار‌ایدی‌. شهرتی سرحدلری آشان خالقمیزین سئویملی اوغلو عمران صلاحی‌له گؤروشوب، قوجاقلاشیرلار. عمران صحنه‌یه دعوت اولور. یوموشاق تبسوملی آذربایجانین وقارلی اوغلو عمرا ن صلاحی سحر ائدیجی طنز‌ی‌ایله مجلیس اشتراکچیلاری‌نین حیرتینه سبب اولور. یوزلر نفرین آلقیش سسی گؤیه اوجالیر. بو شیرین احوال- روحیه‌نین آردی کسیلمه‌دن، میرزا علی اکبر صابیرین سئویملی بالاسی، معجزون خلف ائولادی تبریزدن قوناغیمیز اولان حمید آرش آزاد صحنه‌یه چاغیریلیر. سانکی سالون پارتلاییر؛ گور آلقیش سسلری گؤیه قالخیر؛ اؤز- اؤزومه دئییرم گؤره‌سن نه اولاجاق؟! بو گون ائله بیل عمران- آرش گونودور. عمرانین آردیجا آرش تریبون آرخاسینا کئچیر. کوره‌باشی‌نین گولر اوزلو اوغلو، میرزیه تبریک دئییر، سونرا «نئیله‌ییم» ردیفلی شعرینی اوخوماغا باشلاییر. بوتون مجلیس اشتراکچیلاری ایاغا قالخیر؛ آراسی کسیلمز ال چالمالار آرش‌دن دیگر بیر شعر اوخوماغی طلب ائدیر. آرش اوخویور، جاماعات آلقیشلاییر، میثلی گؤرونمه‌ین بیر حال- هوا یارانیر مجلیسده… چرخی دؤنسون فلکین کی واخت سیز، وعده سیز، هئچ دویمادان آرشیمیزی بیزدن آییردی؛ بیرده بو مجلیسلرده اونون فیزیکی حضورونو حیس ائتمه‌یه‌جه‌ییک؛ آنجاق اونون معنوی عؤمرو دوام ائدیر؛ بیزیمله بیرلیکده‌دیر؛ بیزیمله بیرلیکده یاشاییر عمران صلاحی‌له، مجید یالقیزلا، اوستاد شیدا‌ ایله و…
سسیزلیکدن سسیز
گلیر خاطیره‌لر
بویلانیرلار واراق- واراق،
سطیر- سطیر.
ایتن دئییل
باتان دئییل
سیزین سسیز یاتان دئییل؛
نه گور گلیر هارای- هارای
دوداغیزدا گولوش ایزی،
دیلینیزده خالقین سؤزو،
قلبینیزده وطن سئوگیسی قالاق- قالاق
او داد- دوزو
هاردان آلاق؟،
هاردان آلاق؟

۲۳ مرداد نهمین سالگرد حمید آرش آزاد